ҲАМКОРЛИК АЛОҚЛАРИ ТОБОР КЕНГАЙМОҚДА  

Тошкент вилояти Оққўрғон тумани хокимияти биносида сув хўжалигида давлат-хусусий шериклик лойиҳалари бўйича амалга оширилаётган ишларга бағишланган семинар ташкил этилди. Унда Чирчиқ-Оҳангарон ирригация тизимлари ҳавза бошқармаси ҳисобчиси Б.Раимжонов, давлат хусусий шериклик бўлими бошлиғи Д.Сулаймонов ва Оққўрғон туман ирригация бўлими мутахассислари иштирок этишди.

  Семинарни Чирчиқ-Оҳангарон ирригация тизимлари ҳавза бошқармаси бўлим бошлиғи Д.Сулаймонов олиб борди. У ўз сўзида Ўзбекистон Республикаси Вазирлар Маҳкамасининг “Давлат-хусусий шериклик лойиҳаларини амалга ошириш тартибини такомиллаштириш тўғрисида”ги қарорининг аҳамияти, сув хўжалигида давлат-хусусий шерикликни жорий этишдан кўзланган мақсад ҳамда шу йўналишда амалга оширилаётган ишлар бўйича тўхталар экан, ҳавза бошқармасининг бир қатор туман ирригация бўлимларида  давлат –хусусий шериклик самарали натижа бераётганини таъкидлади.

– Бу тизим ҳар томонлама қулай ва ишончли эканлиги ўз тасдиғини топди, – дейди  ҳавза бошқармаси бўлими бошлиғи  Дилшод Сулаймонов. –  Чунончи, Қуйи Чирчиқ туманидаги ирригация ва мелиорация объектларига туманидаги “ТСТ агро кластер”  корхонаси томонидан ажратилган 1289,1 млн сўм эвазига мелиорация объектлари таъмирдан чиқарилган бўлса, Бўстонлиқ туманидаги  “Сойлиқ-1”. “Сойлиқ-2” ҳамда Хондайлиқ насос станциялари Бўстонлиқ картошкачилик маркази билан ҳамкорлик туфайли  насос агрегатлари янгиланди. Бундай мисолларни Янги йўл, Бекобод туманларида ҳам кузатиш мумкин. Жумладан Бекобод туманидаги 10-02-60 сонли суғориш қудуғи “Бурхон агро файз” фермер хўжалиги ёрдами билан қазилди. Бугунги кунда давлат-хусусий шериклик асосидаги ҳамкорлик алоқлари тобора кенгайиб бормоқда.

     Семинарда сув хўжалигида давлат-хусусий шерикликни жорий этиш мақсади ва ДХШ нинг асосий тушунчалари ҳамда давлат-хусусий шериклик лойиҳалари бўйича амалга оширилаётган ишлар бўйича маълумотлар берилди.

Йиғилиш  давомида мавзуга боғлиқ берилган саволларга мутахассислар томонидан  атрофлича жавоблар берилди.

Чирчиқ-Оҳангарон ИТҲБ матбуот хизмати